Vedtak etter tilsyn med kvalitetsarbeidet ved fem universitet og høgskular
I 2025 og 2026 har NOKUT ført tilsyn med kvalitetssystemet og kvalitetsarbeidet ved fem fleircampusinstitusjonar. Til saman dekkjer dei fem institusjonane om lag 68 000 studentar innan høgare utdanning. Styret i NOKUT gjorde i dag vedtak i sakene.
Vedtaka gjeld Høgskulen på Vestlandet (HVL), Universitetet i Innlandet (INN), Universitetet i Sørøst-Norge (USN), VID vitenskapelige høgskole (VID) og Nord universitet (Nord). HVL, INN, USN og VID oppfyller krava i regelverket, medan Nord må rette opp manglar i kvalitetsarbeidet.
– Resultata viser både at institusjonane jobbar godt og systematisk med kvalitet i utdanningane sine, og at NOKUT si periodiske oppfølging er eit viktig verktøy for vidare utvikling, seier administrerande direktør i NOKUT Kristin Vinje.
Fire institusjonar med tilfredsstillande kvalitetsarbeid
HVL, INN, USN og VID får alle vedtak om tilfredsstillande kvalitetsarbeid. Dei sakkunnige komiteane vurderer at institusjonane har kvalitetssystem og kvalitetsarbeid som oppfyller krava i universitets- og høgskuleforskrifta.
På tvers av dei fire institusjonane peikar komiteane mellom anna på god forankring av kvalitetsarbeidet i leiinga, systematisk innhenting og bruk av kunnskap frå kvalitetsarbeidet for å vidareutvikle kvaliteten i studietilboda og aktiv medverknad frå studentar og tilsette. Komiteane identifiserer også forbetringsområde, men innanfor ramma av eit kvalitetsarbeid som er vurdert som tilfredsstillande.
Les rapportane:
- Høgskulen på Vestlandet (pdf)
- Universitetet i Innlandet (pdf)
- Universitetet i Sørøst-Norge (pdf)
- VID vitenskapelige høgskole (pdf)
Manglar ved Nord universitet
Ved Nord finn NOKUT manglar knytt til krava om periodiske evalueringar av studietilboda, og Nord får eitt år til å rette opp manglane. Nord må blant anna revidere prosesskildringane for periodisk evaluering og nedfelle korleis studentar, stipendiatar, representantar frå arbeids- eller samfunnslivet og eksterne fagfellar skal bidra i evalueringane. Nord må vidare dokumentere korleis studentar/stipendiatar og eksterne deltakar som er relevante for studietilbodet, bidrar i gjennomføringa av periodiske evalueringar.
Samstundes løftar komiteen fram fleire positive sider ved kvalitetsarbeidet ved Nord, mellom anna stort engasjement blant tilsette og studentar og god kontroll med krava til akkreditering av studietilbod.
Les rapporten:
Første gjennomføring i ny runde med periodisk oppfølging
Dei fem institusjonane er dei første som har vorte følgde opp i NOKUT si fjerde runde med periodisk oppfølging av alle institusjonane innan høgare utdanning. NOKUT starta med oppfølging av kvalitetsarbeidet til institusjonane i 2003. Oppfølginga går i tidsrommet 2025 til 2033. I forkant av denne runden har Kunnskapsdepartementet kome med nye krav til kvalitetssystem og kvalitetsarbeid. NOKUT har endra metodikken ved å forsterke utviklingsaspektet ved oppfølginga, i tråd med dei europeiske standardane og retningslinjene for kvalitetssikring i høgare utdanning (ESG).
Dei fire institusjonane som no har fått vedtak om tilfredsstillande kvalitetsarbeid, er ute av tilsynsfasen og skal vidare inn i ein utviklingsfase. Nord skal inn i ein opprettingsfase der institusjonen må vise at han har retta opp manglane. Formålet med oppfølginga er å sikre og vidareutvikle utdanningskvaliteten over tid. Universiteta og høgskulane blir følgde opp minst kvart åttande år.