Høyskolen for dansekunst må framleis styrkje kvalitetsarbeidet
NOKUT-styret har vedteke at kvalitetsarbeidet ved Høyskolen for dansekunst (HFDK) framleis ikkje er tilfredsstillande.
Vedtaket kjem etter at høgskulen har hatt eitt år på seg til å rette opp enkelte manglar i det systematiske kvalitetsarbeidet. Den sakkunnige komiteen meiner HFDK har gjort fleire viktige forbetringar sidan tilsynet i 2024, men at enkelte av krava til kvalitetssystem og kvalitetsarbeid i universitets- og høgskuleforskrifta framleis ikkje er oppfylte.
– HFDK har teke fleire viktige steg for å styrkje kvalitetsarbeidet sitt, og vi ser positiv utvikling på fleire område. Samstundes er det framleis sentrale krav som ikkje er oppfylte, seier NOKUT-direktør Kristin Vinje.
Komiteen trekkjer fram at høgskulen har styrkt den strategiske forankringa av kvalitetsarbeidet og følgt opp fleire av råda i tilsynsrapporten frå 2024. Likevel peikar komiteen på manglar i ordningane for periodisk evaluering og systematisk kontroll av studietilbodet.
På bakgrunn av dette konkluderte NOKUT-styret i dag med at kvalitetsarbeidet med HFDK ikkje er tilfredsstillande. Komiteen tilrår at høgskulen blir følgd opp på nytt innan tre år.
Les tilsynsrapport med vedtak (pdf)
Fakta om høgskulen
Høyskolen for dansekunst (HFDK) er ein privat høgskule i Oslo som tilbyr eit bachelorprogram i dansekunst og koreografi. Studiet rettar seg mot skapande og utøvande dansekunst og har opptak kvart tredje år.
Høgskulen blei oppretta i 2013, som ei vidareføring av den tidlegare fagskulen Skolen for samtidsdans. Bachelorutdanninga vart akkreditert av NOKUT i 2015, og dei første bachelorstudentane starta opp i 2016. Tilsynet i 2024 var det første NOKUT-tilsynet ved HFDK.
HFDK har om lag ti studentar og held til på Dælenenga i Oslo. Institusjonen får statstilskot frå Kunnskapsdepartementet.