Til dykk som vurderar å starte ein fagskule

NOKUT har ansvar for å akkreditere høgare yrkesfagleg utdanning, altså fagskuletilbod, i Noreg. Berre skular som har akkrediterte fagskuletilbod kan kalle seg fagskular. Formålet med akkrediteringa er å sikre at alle fagskuleutdanningar tilfredsstiller dei lovfesta krava til kvalitet i utdanninga. Å sette seg inn i og etterleve regelverk og formelle krav til fagskuleutdanning er ein omfattande jobb som krev kompetanse innan administrasjon, økonomi og pedagogikk, i tillegg til bransjekunnskap.

Vi ser at nye søkarar ofte undervurderer kor lang tid det vil ta å få på plass det som er naudsynt for å få akkreditert ei fagskuleutdanning. Her vil vi difor gje ei overordna forståing av kva det inneber å drive ein fagskule og kva det vil krevje av verksemda. Målgruppa for teksten er dei som ønskjer å søke NOKUT om akkreditering av si første fagskuleutdanning.

Vi har delt teksten inn i to hovuddelar: Ein del som tek føre seg generelle administrative krav for fagskulen som institusjon og ein del som gjeld krav til kvar einskild utdanning.

  • Å drive fagskule krev kompetanse utover å gje undervising.

    For å kunne drive fagskulen på ein lovleg måte, må de kjenne, forstå og følgje regelverket for fagskuleutdanning og reglane i mellom anna forvaltningsloven. De må ha ein administrasjon som kan ta hand om førespurnader frå studentar og tilsette. De skal kunne fatte enkeltvedtak og handsame klager. De skal jobbe systematisk med kvaliteten i utdanninga de tilbyr, og samarbeide med aktørar i arbeidslivet for å sørgje for at utdanninga er relevant for eitt eller fleire yrkesfelt. Dette er nokre eksempel på kompetansar og ordningar de treng.

    De treng økonomiske ressursar og kompetanse i økonomistyring 

    De må sjølve skaffe økonomiske ressursar til å drive utdanninga i tråd med regelverket, både i forkant av oppstart og ved drift. Fagskular som får akkreditert ei utdanning, får ikkje automatisk offentleg tilskot.  

    NOKUT vurderer ikkje økonomien dykkar når de søkjer om akkreditering. Men når styret til fagskulen søkjer akkreditering, forpliktar det seg til å drive den akkrediterte utdanninga i tråd med regelverket. Dette krev blant anna at de kan finansiere og få på plass infrastrukturen og fagmiljøet som førespegla i søknaden. Både utviklinga av styrande dokument for fagskulen, utviklinga av utdanninga og tilsettinga av ein fagleg ansvarleg for utdanninga vil krevje økonomiske ressursar i forkant av at de sender inn søknaden.

    Fagskoleloven handlar mellom anna om reglar for økonomistyringa for private fagskular. For å drive lovleg etter at de har fått ei akkreditering, må de ha kompetanse og system som gjer at de kan følge desse reglane. NOKUT fører økonomisk tilsyn med private fagskular. Dette tilsynet omfattar kontroll av økonomistyringa til institusjonen, arbeidet og samansettinga til styret, og internkontroll. 

    Mange private fagskular mottek ikkje offentlege tilskot, og må basere drifta på skulepengar frå studentane. Alle skulepengar ein fagskule tek imot frå studentane, skal etter regelverket brukast på den akkrediterte utdanninga. 

    De kan søkje om offentleg tilskot til å drive fagskuleutdanning. Det er i hovudsak fylkeskommunen som gjev tilskot til fagskular. De kan kontakte fylkeskommunen dersom de har spørsmål til tilskot. NOKUT løyver ikkje pengar til utdanningar, og kan ikkje svare på spørsmål om korleis de kan få tilskot.

  • I tillegg til å oppfylle dei generelle administrative krava til å vere ein fagskule, må de oppfylle krava som gjeld den einskilde utdanninga de søkjer akkreditering for. Det er mogeleg å søkje om akkreditering av fleire utdanningar samstundes. Utdanninga må ha eit innhald som er i samsvar med krava til nivå, omfang og struktur for fagskuleutdanning, og den må være relevant for eitt eller fleire yrkesfelt. De må ha personell og samarbeidspartnarar som sørgjer for å utforme utdanninga. I tillegg må de ha infrastruktur og eit fagmiljø som kan ivareta ei fagleg og pedagogisk god undervising innanfor faget. Opptakskrava til utdanninga skal sørgje for at de får studentar som har gode føresetnadar for å gjennomføre utdanninga. I tillegg må de sjekke om andre særskilde krav gjeld for utdanninga dykkar, til dømes vurderinga av dugleik, behov for politiattest eller om utdanninga må oppfylle særskilde internasjonale standardar, konvensjonar eller avtalar som Noreg er forplikta å følgje.

    De finn meir informasjon om krava til utdanninga på nettsidene våre og i denne rettleiaren.

    Lover, forskrifter og rettleiingar 

    Denne teksten gjev ikkje ei full oversikt over fagskuleregelverket eller søknadsprosessen. For å få akkreditering og for å drive ei fagskuleutdanning er det naudsynt å sette seg inn i regelverket som gjeld fagskuleutdanningar. Avhengig av organisasjonsform bør de òg kjenne til lovverket som gjeld aksjeselskap eller stifting og krav til rekneskapsføring med meir.

    For å få innsikt i korleis NOKUT vurderer dei ulike krava som må oppfyllast for å kunne få akkreditering, kan det vere nyttig å sjå på det vi kallar tilsynsrapportar for utdanningar innanfor same fagfelt som dykkar. Desse rapportane inneheld vurderingane NOKUT og dei sakkunnige gjer av søknaden i samband med vedtaket om akkreditering. Merk at krava er både administrative og faglege og at dei blir vurderte kvar for seg, so vel som i samanheng.

    For å støtte aktuelle søkjarar har vi utvikla rettleiarar for søknadsprosessen der vi går gjennom kva krav de må oppfylle og kva de blir vurderte etter. Desse oppdaterast kontinuerleg og vi anbefaler at de nyttar dei som oppslagsverk gjennom søknadsprosessen. Vidare tilbyr vi rettleiing gjennom søkarkurs og webinar i tillegg til at vi svarer på spørsmål per telefon og e-post.

    NOKUT har også utarbeida eigne nettsider som tek føre seg viktige regelverksområder og gjev svar på ofte stilte spørsmål. I tillegg kan det vere nyttig å lese det NOKUT publiserer om utdanningskvalitet i fagskulen.  

    Fleire informasjonskjelder for deg som skal starte opp ein fagskule og utvikle fagskuleutdanningar:

    • Arbeidsgjevar- og arbeidstakarorganisasjonar innan bransjen til utdanninga
    • Nasjonalt fagskoleråd
    • Organisasjon for norske fagskolestudenter (ONF)

    Etablerte fagskular