Historisk akkreditering av ph.d.-utdanning ved Høgskolen i Østfold
Med akkreditering av Digitalisering og samfunn har Høgskolen i Østfold fått sitt første doktorgradsprogram.
Styret i NOKUT vedtok i dag å godkjenne søknaden frå Høgskolen i Østfold (HiØ).
Tilsynsdirektør i NOKUT, Nina Waaler, gratulerer høgskulen med doktorgradsprogrammet.
– Innstillinga frå den sakkunnige komiteen talar for seg, og det var ingen tvil om kva vedtaket skulle landa på. I søknaden og under institusjonsbesøket har HiØ vist at høgskulen har eit fagmiljø med høg kompetanse på utdanning og forsking innan den faglege profilen til programmet, seier Waaler.
Fullmakt til å oppretta masterstudium i same fagfelt
Høgskolen i Østfold har fått akkreditering for ph.d.-programmet i digitalisering og samfunn. Programmet har fire bestanddelar, DigiWork, DigiTech, DigiEd og DigiHealth, og skal gå på dei to campusane i Fredrikstad og i Halden.
Høgskolen i Østfold er ein akkreditert høgskule og har med det hatt fullmakter til å oppretta eigne studietilbod på bachelornivå. For å oppretta studietilbod på master- og doktorgradsnivå har høgskulen fram til no måtta søkja NOKUT om akkreditering.
Men med dagens vedtak og eit ph.d.-program på plass kan høgskulen no også oppretta studietilbod på masternivå innanfor det same fagfeltet, utan på førehand å måtta søkja NOKUT om godkjenning.
Rapport:
Ph.d. i digitalisering og samfunn (pdf)