Kvalitetsarbeidet ved NSKI Høyskole er ikkje tilfredsstillande
Høgskulen viser framgang i arbeidet etter vedtak om oppretting av vesentlege manglar i 2023, men er framleis ikkje heilt i mål.
NOKUT førte tilsyn med det systematiske kvalitetsarbeidet ved NSKI Høyskole (NSKI) i 2023, og 25. oktober same året vedtok styret i NOKUT at kvalitetsarbeidet ved høgskulen hadde vesentlege manglar. Etter eitt år med oppretting og ei vurdering av ny dokumentasjon på kvalitetsarbeidet har styret i NOKUT vedteke at det systematiske kvalitetsarbeidet ved NSKI Høyskole framleis ikkje er tilfredsstillande. Høgskulen har ikkje dokumentert rutinar eller praksis for systematisk kontroll med at studietilboda til ei kvar tid oppfyller krava til akkreditering. Dermed er krava i universitets- og høgskuleforskrifta § 1-7 bokstav b og § 1-8 femte ledd ikkje oppfylte.
– Alle høgare utdanningsinstitusjonar i Noreg har ansvar for å sikre at studietilboda deira til ei kvar tid oppfyller minstekrava til akkreditering i regelverket. Dette er heilt avgjerande for den tillitsbaserte modellen vi har i norsk høgare utdanning, seier NOKUT-direktør Kristin Vinje.
Så lenge kvalitetsarbeidet ved NSKI ikkje er godkjent av NOKUT, kan NOKUT pålegge NSKI søknadskarantene for søknadar om akkreditering av nye studietilbod og for søknadar om akkreditering som høgskule.
NSKI Høyskole kan be NOKUT om å gjennomføre eit nytt tilsyn ved institusjonen tidlegast eitt år etter vedtaket om ikkje tilfredsstillande kvalitetsarbeid.
Framgang, men ikkje i mål
Den sakkunnige komiteen som har vurdert kvalitetsarbeidet ved NSKI, peikar på at høgskulen har hatt ei god utvikling sidan førre tilsyn, og at kvalitetsarbeidet no er betre forankra, dokumentert og organisert. Både styret, leiinga og dei tilsette er meir bevisste på betydninga kvalitetsarbeidet har for studiekvaliteten. Innføringa av såkalla demokratitid, der ein halv dag i veka er satt av til møteverksemd, trekkjast fram som eit tiltak som har styrkt både forankringa og medverknaden.
Samtidig konkluderer komiteen med at NSKI ikkje har kome heilt i mål. Kravet om systematisk kontroll med at eksisterande studietilbod tilfredsstiller krava til akkreditering, er ikkje oppfylt. Slike kontrollrutinar er avgjerande for at styresmaktene, studentar, arbeidsgjevarar og samfunnet elles skal kunne ha tillit til at utdanningane ved institusjonen held minstekrava som gjeld i norsk og europeisk høgare utdanning.
Om NSKI Høyskole
NSKI Høyskole er ein privat høgskule i Oslo som tilbyr fire bachelorutdanningar innan regi, manus, musikkteater og skodespelarfag, i tillegg til vidareutdanninga Scenekunstner i egenskapte produksjoner. Høgskulen har rundt 170 studentar og er finansiert gjennom skulepengar frå studentane. Institusjonen vart etablert som fagskule under namnet Norsk Skuespillerinstitutt i 2009. I 2014 fekk NSKI akkreditert sine første bachelorprogram og vart dermed ein aktør innan høgare utdanning.