Læringsutbyte og Nasjonalt kvalifikasjonsrammeverk for livslang læring

Alle fagskuleutdanningar skal ha formulert læringsutbyteskildringar for utdanninga og for dei enkelte emna. Desse skal vere i tråd med Nasjonalt kvalifikasjonsrammverk for livslang læring (NKR). I denne teksten finn de informasjon om læringsutbyte for fagskuleutdanningar og regelverket som regulerer dette.

Oppdatert 7. november 2023

 

  • Læringsutbyte er det ein student kan, forstår og er i stand til å gjere etter enda utdanning. Læringsutbyteskildringar er verktøy for å jobbe systematisk med læringsutbytet, for å utvikle utdanningskvaliteten, og for å kommunisere til studentar, arbeidsliv og samfunnet elles kva kompetanse ein kan som minimum forvente av ein person som har gjennomført og bestått utdanninga. Læringsutbyteskildringar er på denne måten både eit pedagogisk verktøy og eit verktøy for å gjere kompetanse meir synleg og forståeleg.

    Læringsutbyteskildringar blir gjerne formulert under tre kategoriar: kunnskap, ferdigheiter og generell kompetanse. Nasjonalt kvalifikasjonsrammeverk for livslang læring gjev visse rammer for korleis læringsutbyteskildringane skal vere utforma.

  • Det er fleire krav som regulerer bruken av læringsutbyteskildringar i fagskuleutdanningar. Desse krava heng tett saman, og de skal sikre at læringsutbyteskildringane for utdanningane bidrar til godt samsvar mellom dei ulike sidene ved utdanninga.

    Fagskuletilsynsforskrifta § 2-1 inneheld dei viktigaste krava.

    Læringsutbytet av ei fagskuleutdanning skal vere forankra i eit yrkesfelt. Det betyr at det skal dekke eit kompetansebehov yrkesfeltet har, og det skal vere tilstrekkeleg for å utøve yrket. Utdanningas faglege innhald og oppbygning skal vere utforma slik at det er eigna for at studentar skal kunne oppnå det forventa læringsutbytet. Utdanningas pedagogiske opplegg, det vil seie undervisnings-, lærings- og vurderingsformer, skal også vere utforma slik at dei er eigna for at studentane skal kunne oppnå det forventa læringsutbytet. De må forstå desse krava som at det skal vere eit meiningsfullt samsvar mellom utdanningas ulike element, og mellom utdanninga og det yrkesfeltet utdanninga rettar seg mot.

    Vitnemålet for fullført fagskuleutdanning skal innehalde den overordna læringsutbyteskildringa for utdanninga, jf. fagskuletilsynsforskrifta § 2-7.

    Nasjonalt kvalifikasjonsrammeverk for livslang læring bestemmer kva nivå ulike utdanningar i Noreg skal liggje på. Dette gjev òg rammer for utforminga av læringsutbyteskildringane, og set krav til nivået av kompleksitet og breidde som utdanninganes læringsutbyte skal ha. Fagskulelova krev at utdanninga skal vere i samsvar med NKR, og bestemmer dermed minimumsnivået på utdanninga. Fagskuletilsynsforskrifta krev at utdanningas læringsutbyte skal vere utforma i tråd med NKR, og gjev dermed krav til korleis fagskulane skal utforme læringsutbyteskildringane. Det forventa læringsutbytet heng også saman med utdanningas omfang. Sjølv om læringsutbytet primært skal vere knytt til nivået av kompleksitet, må læringsutbytet også vere av eit omfang som er realistisk å oppnå innanfor rammene av utdanninga.

  • De må utforme skildringar av eit overordna læringsutbyte for heile utdanninga. Det er dette som skal vere utforma i tråd med NKR, og som skal minimum vere på det nivået som NKR bestemmer. Det er også dette overordna læringsutbytet som skal vise utdanningas forankring i yrkesfeltet og som de må føre opp på vitnemålet.

    De må også ha læringsutbyteskildringar for dei enkelte emna i utdanninga. Dette er ikkje eit eksplisitt krav i regelverket, men følgjer av summen av krava til overordna læringsutbyte og dei andre krava til fagskuleutdanning. Eit emne er den minste resultatberande eininga som gjev studiepoeng i ei fagskuleutdanning. Det betyr at de må ha eigne lærings- og vurderingsaktivitetar for emnet for å sikre at studenten har bestått emnet. Det betyr igjen at de må ha utarbeidd eit forventa læringsutbyte som læringsaktivitetane skal bidra til at studentane når, og vurderingsaktivitetar som gjer at de kan sikre at studenten har oppnådd dette.

    Saman utgjer dette ei forventning til at fagskulen arbeider systematisk med forholdet mellom emnets innhald, og emnets lærings- og vurderingsaktivitetar. Dette er også ei forventning om at fagskulen jobbar systematisk med forholdet mellom læringsutbytet for enkeltemna og det overordna læringsutbytet for utdanninga. På den måten skal dei emnevise læringsutbyta føre fram til læringsutbytet for utdanninga.

  • Gode læringsutbyteskildringar for utdanninga og for enkeltemne kjenneteiknast av at dei fungerer godt som pedagogisk verktøy i vidareutviklinga og kvalitetssikringa av utdanninga. Det betyr at dei bidrar til at fagskulen kan planleggje, gjennomføre og evaluere utdanninga. Og det betyr at dei er slik at dei gjer det mogleg å vurdere om studentane har oppnådd det forventa læringsutbytet. Saman tyder det at det er godt samsvar mellom utdanningas ulike element.

    Gode læringsutbyteskildringar kjenneteiknast også av at dei kommuniserer klart til potensielle studentar, arbeidsliv og storsamfunnet kva ein student er forventa å kunne, forstå og vere i stand til å gjere. Det betyr at læringsutbyteskildringane kommuniserer den faglege substansen i læringsutbytet. Det betyr også at det kommuniserer korleis fagskuleutdanninga er plassert i det norske utdanningssystemet, gjennom nivå og breidde på læringsutbytet.


Informasjonsvideoar