Tilsyn ved universitet, høgskular og fagskular
NOKUT kan på fritt grunnlag føre tilsyn med alle eksisterande studietilbod, med institusjonsakkrediteringane til universitet og høgskular og med fagområdeakkrediteringane til fagskular. Tilsyn med studietilbod kan setjast i gang både for dei studietilboda som universiteta, høgskulane og fagskulane har etablert på eiga fullmakt og for dei studietilboda som NOKUT har akkreditert.
Når NOKUT fører tilsyn, bruker vi dei same kriteria som ved akkreditering. I tillegg til å kontrollere at studietilboda eller institusjonane oppfyller krava i forskriftene, ønskjer vi at tilsynet skal bidra til vidareutvikling.
Former for tilsyn
Ved tilsyn med akkrediteringen til studietilbod ved universitet og høgskular blir det ført tilsyn med krava i kapittel 3 i Kunnskapsdepartementets forskrift om kvalitetssikring og kvalitetsutvikling i høgare utdanning og fagskoleutdanning (studiekvalitetsforskrifta) og i kapittel 2 i NOKUTs forskrift om tilsyn med utdanningskvaliteten i høgare utdanning (studietilsynsforskrifta).
For fagskular ligg krava til kvalitet i studietilbod i lov om høgare yrkesfagleg utdanning, i NOKUTs forskrift om akkreditering av og tilsyn med høgare yrkesfagleg utdanning (fagskoletilsynsforskrifta) og i Kunnskapsdepartementets forskrift om kvalitetssikring og kvalitetsutvikling i høgare utdanning og fagskuleutdanning (studiekvalitetsforskrifta) og forskrift om høgare yrkesfagleg utdanning (fagskoleforskrifta).
Ved tilsyn med akkrediteringa til universitet, vitskaplege høgskular og høgskular blir det ført tilsyn med krava i Kunnskapsdepartementets forskrift til universitets- og høgskuleloven (universitets- og høgskuleforskrifta).
For fagområdeakkreditering ligg krava i NOKUTs forskrift om akkreditering av og tilsyn med høgare yrkesfagleg utdanning (fagskoletilsynsforskrifta).
Når NOKUT fører tilsyn med eksisterande studietilbod eller institusjonar, vurderer vi samsvaret mellom krava i forskriftene og dei faktiske forholda ved studietilbodet eller institusjonen. NOKUT kan føre tilsyn med enkelte av krava eller med alle krava som gjeld akkrediteringa.
Kort om tilsynsprosessen
Når NOKUT har vedtatt å opne eit tilsyn, blir institusjonen det gjeld, varsla om tilsynet. NOKUT vender seg deretter til institusjonen for å informere om tilsynsprosessen og for å innhente dokumentasjon. NOKUT innhentar også dokumentasjon frå eigne og eksterne databasar. Institusjonane pliktar å gi NOKUT den informasjonen vi ber om, innan oppgitt tidsfrist.
Dokumentasjonen blir vurdert ved hjelp av sakkunnige. NOKUT gjennomfører vanlegvis eit institusjonsbesøk, der ein sakkunnig komité har samtalar med relevante aktørar ved institusjonen. På vegner av komitéen utarbeider saksbehandlarar i NOKUT ei innstilling, eller skriftleg vurdering. NOKUT sender innstillinga til institusjonen, som får mogelegheit til å kommentere vurderingane til den sakkunnige komitéen. Viss NOKUT finn at krava er oppfylte, kan tilsynet avsluttast.
Dersom NOKUT finn at krava ikkje er oppfylte, får institusjonen ein rimeleg frist for å rette opp dei påpeikte manglane. Innan fristen er gått ut, leverer institusjonen dokumentasjon på kva endringar som er gjorde for å oppfylle pålegga om retting som følgjer av NOKUTs vedtak. Den sakkunnige komitéen gjer ei ny vurdering av om studietilbodet/institusjonen oppfyller gjeldande krav til akkreditering, og vurderingane og tilrådingane til komitéen blir nedfelte i ei ny innstilling. Basert på den sakkunnige vurderinga vil NOKUT anten avslutte saka (viss krava er oppfylte) eller fatte vedtak om at akkrediteringa blir tilbake trekte (viss krava framleis ikkje er oppfylte).
Dersom institusjonen mister akkreditering for eit studietilbod, er institusjonen forplikta til å skaffe studentane alternative studieplassar. Det alternative tilbodet skal godkjennast av NOKUT.
Bruk av sakkunnige
NOKUT skal bruke sakkunnige ved tilsyn der det skal gjerast faglege vurderingar. Dei sakkunnige skal gi vurderingane og tilrådingane sine til NOKUT. NOKUT har fått myndigheit til å fastsetje nærare kriterium for kompetansen til dei sakkunnige. Kriteria ligg i studietilsynsforskrifta § 5-6. Dei sakkunnige skal ikkje ha oppgåver ved institusjonen eller studietilbodet dei skal vurdere, og heller ikkje andre tilknytingar til institusjonen som kan medføre inhabilitet. Institusjonane får høve til å kommentera NOKUTs forslag til sakkunnige før komitéen blir oppnemnd.
Klagerett
Ein institusjon kan klage på NOKUTs vedtak etter reglane i forvaltningsloven kapittel VI. Institusjonen kan likevel ikkje klage på NOKUTs faglege vurdering, jf. studiekvalitetsforskriften § 1-9. Klagefristen er tre veker frå orienteringa om vedtaket har kome fram til institusjonen. Institusjonen gjer reie for kva grunnlag han klagar på, og stiler klagen til NOKUT. Viss NOKUT ikkje finn grunnlag for å gjera om vedtaket, blir saka send vidare til NOKUTs klagenemnd, som behandlar klagen.
Klagenemnda kan vurdere om NOKUT har begått saksbehandlingsfeil eller rettsanvendelsesfeil, og om det finnast styresmaktsmisbruk, usakleg forskjellsbehandling eller andre brot på forvaltningsrettslege prinsipp. Klagenemnda kan ikkje overprøve dei faglege vurderingane til NOKUTs sakkunnige.